ಬಾಪೂ ಮ್ಹಜ್ಯಾ, ಚರಣಾಂಕ್ ತುಜ್ಯಾ ಪ್ರಣಾಮ್ ಮ್ಹಜೆ ಹಜಾರ್
ತರೀ ತುಜ್ಯಾ ಚುಕಿ ವೊಜ್ಯಾಂಕ್ ಕಶೆಂ ಘೆಂವುಂ ಖಾಂದಾರ್?
ಚರಕ್ ತುಜೆಂ ಸುತಾಂ ವೊಳ್ತಾಂ, ಸತಾಂ ಕಿತ್ಯಾಕ್ ತುಟಯ್ಲಿಂ?
ಬುರಾಕ್ ರಚುನ್ ಮರ್ಯಾದಿಚಿಂ ಕುಸಾಂ ಕಿತ್ಯಾಕ್ ಉಸಯ್ಲಿಂ?
ಆಜ್ ಮ್ಹಜ್ಯಾ ದೇಸಾಕ್ ಗಾ ಸೊಭಾಯೆಚಿ ಗಿರಾಂತ್
ಪೂಣ್ ಬಾಪೂ ಸತಾಂ ವಿಣೆಂ ಮಾನ್ ಉಬ್ಚಿ ಭಿರಾಂತ್
ಜಾಣ್ವಾಯೆಚೊ ಸಾಗೊರ್ ತುಂ ಉದಂಡ್ ತುಜಿ ತಾಂಕ್
ತರೀ ತಾಂತ್ಲೆಂ ಮೀಟ್ ವಿಂಚುನ್ ಕಿತ್ಯಾಕ್ ವ್ಹೆಲೆಂಯ್ ಸಾಂಗ್?
ಆಜ್ ಮ್ಹಜ್ಯಾ ದೇಸಾಂತ್ ಗಾ ರಾಂದ್ಪಾಂಚಿಚ್ ರಾಸ್
ಪೂಣ್ ಬಾಪೂ ಮಿಟಾಂವಿಣೆಂ ಚುಕೊನ್ ಗೆಲ್ಯಾ ರೂಚ್
ಅಹಿಂಸೆಚೊ ರಸ್ತೊ ತುಂ ಪಯಣ್ ಸುಡಾಳ್ ಖರೆಂ
ತುವೆಂಚ್ ತಾಂತ್ಲೆ ಫಾತೊರ್ ವಿಂಚುನ್ ಬಗ್ಲೆಕ್ ಘಾಲ್ಲೆ ದೊರೆ
ಆಜ್ ಮ್ಹಜ್ಯಾ ದೇಸಾಂತ್ ಗಾ ರಸ್ತ್ಯಾಂಚಿಚ್ ಕ್ರಾಂತಿ
ಪೂಣ್ ಬಾಪೂ ಫಾತ್ರಾಂವಿಣೆಂ ಇರೊನ್ ಗೆಲ್ಯಾ ಮಾತಿ
ಮರಣಾಚೊ ಜೀವ್ ತುಂ ದೆಸಾಕ್ ದಿಲೊಯ್ ಪ್ರಾಣ್
ತರೀ ಜಿಯೆಂವ್ಕ್ ಆಶೆತಲ್ಯಾಂಚೆಂ ಕಿಮ್ಚುನ್ ವ್ಹೆಲೆಂಯ್ ತ್ರಾಣ್
ಆಜ್ ಮ್ಹಜ್ಯಾ ದೇಸಾಂತ್ ಗಾ ಮೊರ್ನಾಂಚಿಂಚ್ ರುದಾನಾಂ
ಪೂಣ್ ಬಾಪೂ ತ್ರಾಣಾವಿಣೆಂ ರಡ್ತಲ್ಯಾಂಕ್ ನಾಂತ್ ಗಿನ್ಯಾನಾಂ
ಹೇ ಬಾಪೂ... ದೇಸ್ ಮ್ಹಜೊ ಮ್ಹಾನ್ ಗಾ, ಮ್ಹಾನ್ ಗಾ
ಪೂಣ್ ತಾಕಾ ರಗ್ತಾಂಚಿಚ್ ತಾನ್ ಗಾ, ತಾನ್ ಗಾ!
- ಲೊಯ್ಡ್ ರೇಗೊ (2007)
