ರುಕಾರ್ ಥಾವ್ನ್ ಝಡೊನ್
ಏಕ್ ಪಿಕಿ ಖೊಲಿ
ಉದ್ಕಾಚೆ ಬಾಲ್ದೆಕ್ ಪಡ್ಲಿ
ರುಕಾ ವಯ್ಲೆ ತರ್ನೆ ಖೊಲೆ
ಗಳ್ಗಳ್ಯಾಂ ರಡ್ಲೆ!
**********
ಪಿಯೆಂವ್ಚ್ಯಾ ಉದ್ಕಾ ಖಾತಿರ್
ದುಕಾಂ ಗಳೊಂವ್ಚೆ ದೊಳೆ
ಪಾದ್ರಿನ್ ಮೊಡ್ಯಾರ್
ಆಗ್ಮೆಂತ್ ಉಡಯ್ತಾನಾ
ರಾಗಾನ್ ತಾಂಬ್ಡೆ ಜಾಲೆ!
**********
ಉದಕ್ ವೊತುನ್
ಸೊರೊ ಪಿಯೆಂವ್ಚೊ ತೊ
ಆತಾಂ ಉದ್ಕಾಕ್
ಸೊರೊ ವೊತ್ತಾ!
**********
ಸಯ್ರಿಕೆ ವೆಳಾರ್
ಆದಿಂ- ಜಾಗೊ ಕಿತ್ಲೊ ಆಸಾ?
ಆತಾಂ-ದುಡು ಕಿತ್ಲೊ ಆಸಾ?
ಫುಡೆಂ-ಉದಕ್ ಕಿತ್ಲೆಂ ಆಸಾ??
**********
ಬೋರ್ ವೆಲ್ಲಾಂತ್
ಧಾರಾಳ್ ಉದಕ್ ಮೆಳ್ಳೆಂ ದೆಕುನ್
ಪುತಾನ್ ಬಾಬಾಚಿ ಬಾಂಯ್ ಪುರ್ಲಿ.
ಆತಾಂ ಬೋರ್ ವೆಲ್ ಡ್ರಾಯ್ ಜಾಲಾಂ
ದೆಕುನ್ ನಾತು
ನಂಯ್ ಗುಂವ್ಡಾಂವ್ಕ್ ಗೆಲಾ!
**********
ತಾಚ್ಯಾ ಘರ್ಚ್ಯಾಂನಿ
ಪಾವ್ಸಾ ಖಾತಿರ್ ದುಖಾಂ ಗಳೊವ್ನ್
ಮಾಗ್ ಲ್ಲೆಂ
ಭೋವ್ ಶ್ಯಾ, ಹಾಚ್ಯಾ ಘರ್ಚ್ಯಾ
ಸ್ಪ್ರಿಂಕ್ಲರಾಂಚ್ಯಾ ನೊನ್ ಸ್ಟೊಪ್
ಆವಾಜಾಕ್ ಲಾಗುನ್
ದೆವಾಕ್ ಆಯ್ಕಾಲೆಂನಾ!
**********
ಆಜೊ
ಬಾಲ್ದೆಂನಿ ಉಸ್ಪೊನ್ ನ್ಹಾತಾನಾ
ನಾತು...
ಗೊಬ್ಳ್ಯಾಂತ್ ಭರುಂಕ್
ಶಿಕ್ತಾಲೊ!
**********
ಬಾವಿಸಾವ್ಯಾ ಶೆಕ್ಡ್ಯಾಂತ್
ಘರಾಂನಿ ಚೋರ್ ರಿಗ್ತಲೆ
ದುಡು- ಭಾಂಗಾರ್ ಸೊಡ್ತಲೆ
ಆಕ್ವೇರಿಯಮಾಂ ವ್ಹರ್ತಲೆ!
**********
- ಲೊಯ್ಡ್ ರೇಗೊ (ಎಪ್ರಿಲ್-2019)
