ತುಜ್ಯಾ ಭಾಂಗಾರ್ ಮನಾ ಮಾಳಾರ್, ಹಾಂವ್ ಫಕತ್ ಮಾತ್ಯೆ ಮುದೊ
ಮಾಯೆ ತುಜ್ಯಾ ಮೊಗಾ ಮುಕಾರ್, ಪೂತ್ ತುಜೊ ಮುಯೆತೆದೊ
ತುಂವೆಂ...
ಘಾಮಾಂತ್ ಆಟೊನ್, ಪಾವ್ಸಾಂತ್ ಭಿಜೊನ್
ಹಿಂವಾಂತ್ ಆಂಕ್ಡೊನ್, ದೊವಾಂತ್ ತೊವುನ್
ಬಾಗೊನ್ ವಾಡ್ ಲ್ಲೆ ದೊಯೆ ಪೆಜೆನ್
ದಿಲ್ಲಿ ಮ್ಹಾಕಾ ಘಟಾಯ್!
ತುಜ್ಯಾ ದಯೆ ದರ್ಯಾ ವೆಳೆರ್, ಹಾಂವ್ ಫಕತ್ ಮಿಟಾ ಕಡೊ
ಮಾಯೆ ತುಜ್ಯಾ ಮೊಗಾ ಮುಕಾರ್, ಪೂತ್ ತುಜೊ ಮುಯೆತೆದೊ
ತುಂವೆಂ...
ಮಿಟಾಂತ್ ಘಾಲ್ಲೆ ಆಂಬೆ, ವೊಂಟಾಂಕ್ ಚಿಂವಯಿಲ್ಲಿ ಸಾಕರ್
ಮುಟಿಂತ್ ದಿಲ್ಲಿಂ ಸುರ್ಣಾಂ ಆನಿ ಪಾಟಿಕ್ ಲಾಯಿಲ್ಲೆಂ ಆಡಾರ್
ರುಚಿನ್ ಹಾಂವೆಂ ಖಾವುನ್ ಖಾವುನ್
ಜಿವಿತ್ ಗೋಡ್ ಮಿಟಾಯ್!
ತುಜ್ಯಾ ಮಧುರ್ ಉತ್ರಾಂ ವಿಣ್ಯಾರ್, ಹಾಂವ್ ಫಕತ್ ಮಿಂಜಿತ್ ನಾಡೊ
ಮಾಯೆ ತುಜ್ಯಾ ಮೊಗಾ ಮುಕಾರ್, ಪೂತ್ ತುಜೊ ಮುಯೆತೆದೊ
ತುಂವೆಂ...
ಬಿಡಿಯೊ ಗುಟ್ಲಾವ್ನ್, ವೋಳಿಂಚೆರ್ ಖಿರ್ಲಾವ್ನ್
ಪೆಂಡಿಯೊ ದಾಳುನ್, ವೊಳ್ಯಾಂಚೆಂ ಪುಂಜಾವ್ನ್
ಪಾಲ್ವಾಗಾಂಟ್ ರಿತಿ ಕರುನ್
ಜಿಣ್ಯೆಕ್ ದಿಲಿ ಉಂಚಾಯ್!
ತುಜ್ಯಾ ನಿರ್ಮಳ್ ಜಿಣ್ಯೆ ಸಾಮ್ಖಾರ್, ಹಾಂವ್ ಫಕತ್ ಕಿರ್ಕೊಳ್ ಕಿಡೊ
ಮಾಯೆ ತುಜ್ಯಾ ಮೊಗಾ ಮುಕಾರ್, ಪೂತ್ ತುಜೊ ಮುಯೆತೆದೊ
- ಲೊಯ್ಡ್ ರೇಗೊ
