ಮಿಸಾಕ್ ಕಿತ್ಯಾಕ್ ವೆತಾಯ್ ಬಾಳಾ
ಮಿಸಾಕ್ ಕಿತ್ಯಾಕ್ ವೆತಾಯ್?
ಮಿಸಾಕ್ ಗೆಲ್ಯಾರ್ ಮ್ಹಾಕಾ ಜೆಜು
ತುಂ ಸರ್ಗಾಕ್ ಆಪವ್ನ್ ವ್ಹರ್ತಾಯ್!
ಮಿಸಾಕ್ ಕಿತ್ಯಾಕ್ ವೆತಾಯ್ ಚೆಡ್ವಾ
ಮಿಸಾಕ್ ಕಿತ್ಯಾಕ್ ವೆತಾಯ್?
ವಾಚಾಪ್ ವಾಚುಂಕ್ ಮ್ಹಾಕಾಚ್ ದಿಲಾಂ
ಪಳೆತಲ್ಯಾಕ್ ಸೊಭಾಯ್!
ಮಿಸಾಕ್ ಕಿತ್ಯಾಕ್ ವೆತಾಯ್ ಚೆಡ್ಯಾ
ಮಿಸಾಕ್ ಕಿತ್ಯಾಕ್ ವೆತಾಯ್?
ವಾಚಾಪ್ ವಾಚುಂಕ್ ಆಸ್ಚೆಂ ಚೆಡುಂ
ತುಂ ಮ್ಹಾಕಾಚ್ ದಿತಾಯ್!
ಮಿಸಾಕ್ ಕಿತ್ಯಾಕ್ ವೆತಾಯ್ ದಾದ್ಲ್ಯಾ
ಮಿಸಾಕ್ ಕಿತ್ಯಾಕ್ ವೆತಾಯ್?
ಘರಾಂತ್ ಬಾಯ್ಲೆ ಕರಂದಾಯ್
ಮಿಸಾಂತ್ ಶಾಂತೆನ್ ಭರ್ತಾಯ್!
ಮಿಸಾಕ್ ಕಿತ್ಯಾಕ್ ವೆತಾಯ್ ಸ್ತ್ರೀಯೆ
ಮಿಸಾಕ್ ಕಿತ್ಯಾಕ್ ವೆತಾಯ್?
ಮಿಸಾ ಉಪ್ರಾಂತ್ ಮೀಟಿಂಗ್ ಆಸಾ
ತೆಸಾಂವಾಂಚಿ ಪಿಸಾಯ್!
ಮಿಸಾಕ್ ಕಿತ್ಯಾಕ್ ವೆತಾಯ್ ವಿಗಾರಾ
ಮಿಸಾಕ್ ಕಿತ್ಯಾಕ್ ವೆತಾಯ್?
ಆತಾಂ ಆತಾಂ ಇಜ್ಮೊಲಾ ವಾಟ್ಲಿ
ಮಾತ್ಶಿ ಚಡ್ ಚ್ ಭರ್ತಾಯ್!
ಮಿಸಾಕ್ ಕಿತ್ಯಾಕ್ ವೆತಾಯ್ ಆಬಾ
ಮಿಸಾಕ್ ಕಿತ್ಯಾಕ್ ವೆತಾಯ್?
ಮಿಸಾಕ್ ಗೆಲ್ಯಾರ್ ಮ್ಹಾಕಾ ಜೆಜು
ತುಂ ಸರ್ಗಾಕ್ ಆಪವ್ನ್ ವ್ಹರ್ತಾಯ್!
ತಿಂ ಸಗ್ಳಿಂ ಮಿಸಾಕ್ ಗೆಲಿಂ, ಜೆಜು ಭಾಯ್ರ್ ಚ್ ಉರ್ಲೊ
ಇಗರ್ಜೆಂತ್ ಸ್ವಾರ್ಥ್ ಭರ್ಲೊ, ಜೆಜು ಪರತ್ ಸರ್ಲೊ!
- ಲೊಯ್ಡ್ ರೇಗೊ
