ಕೊಂಕ್ಣಿಂತ್ ಪತ್ರಾಂ, ಬೂಕ್ ವ ಸಿಡಿ ಪರ್ಗಟ್ಚೆಂ, ಡ್ರಾಮಾ ವ ನಾಯ್ಟಾಂ ಸಾದರ್ ಕರ್ಚೆಂ ಫಾಯ್ದ್ಯಾಚೆಂ ನ್ಹಯ್ ತಿ ಗಜಾಲ್ ಸರ್ವಾಂಕ್ ಕಳಿತ್ ಆಸ್ಚಿಚ್. ತರೀ ಸಬಾರಾಂನಿ ಧಯ್ರ್ ಸಾಂಡಿನಾಸ್ತಾನಾ, ಲುಕ್ಸಾಣ್ ತರೀ ವ್ಹಡ್ ನಾ, ಸಾಧನ್ ಕರ್ತಾಂ, ತಾಲೆಂತ್ ದಾಕಯ್ತಾಂ, ಕೊಂಕ್ಣಿ ಖಾತಿರ್ ಕರ್ತಾಂ, ಖೊರ್ಜಿ ಖಾತಿರ್ ಕರ್ತಾಂ, ಹಾಂವ್ ಲಾಭ್ ಕರುನ್ ದಾಕಯ್ತಾಂ ಅಶೆಂ ಮ್ಹಣ್ ವಯ್ಲ್ಯಾ ಸರ್ವ್ ಶೆತಾಂನಿ ತವಳ್ ತವಳ್ ಕೊಸ್ಲಾಂ, ಕೊಣೆಂ ಪೀಕ್ ವಾಡಯ್ಲಾಂ ಆನಿ ಕೊಣೆಂ ನಾಲಿಯೊ.
ಹ್ಯಾ ಮಧೆಂ ಕೊಂಕ್ಣಿಂತ್ ಫಿಲ್ಮಾಂ ಕಾಡ್ಚಿ ಆಲೋಚನ್ ತವಳ್ ತವಳ್ ಕೊಣಾಕ್ ಆಯ್ಲಿ, ಕೊಣೆಂ ಕಾಡ್ಲಿಂ, ಕೊಣೆ ಲುಕ್ಸಾಣ್ ಭೊಗ್ಲೆಂ, ಕೊಣೆ ಹಾತ್ ಹುಲ್ಪಾಯ್ಲೆ ಆನಿ ಕೊಣೆಂ ಫಿಲ್ಮ್ ನಾಟಕಾಂಚ್ಯಾ ಮಟ್ಟಾಕ್ ಹಾಡ್ನ್ ಭೊಂಗಸ್ತಳ್ ಕೆಲೊ.
ಆತಾಂ ತುಳ್ವೆಂತ್ ಜಾಂವ್ಚೆ ಫಿಲ್ಮಾಂಚೆ ಆಬಾತಾರ್ ಪಳೆವ್ನ್ ಕೊಂಕ್ಣಿಂತ್‍ಯಿ ಫಿಲ್ಮಾಂ ಕಾಡ್ಚೆ ಅತ್ರೆಗ್ ಥೊಡ್ಯಾಂ ಥಂಯ್ ಉಮಾಳ್ಳ್ಯಾತ್. ಎದೊಳ್‍ಚ್ ದೋನ್ ಫಿಲ್ಮಾಂ ಯೇವ್ನ್‍ಯಿ ಜಾಲಿಂ. ಲೊಕಾಂನಿ ಟಿಕೆಟ್ ಕಾಡ್ನ್ ಥಿಯೆಟರಾಂಕ್ ಯೇವ್ನ್ ಪಳೆಲ್ಲೆಂ ಉಣೆಂ ತರೀ ಫೇಸ್‍ಬುಕ್, ವಾಟ್ಸಾಪಾಚೆರ್ ಫಿಲ್ಮಾಂಚಿಂ ಪೋಸ್ಟರಾಂ ಹಜಾರಾಂ ಲೆಕಾನ್ ಶೇರ್ ಜಾಲಿಂ ದೆಕುನ್ ಆನಿ ಅಧಿಕೃತ್ ಮೀಡಿಯಾಚ್ಯಾಂನಿ ಪಬ್ಲೆಸಿಟಿ ಬರೀ ಕರುನ್ ದಿಲಿ ದೆಕುನ್ ತಿಂ ಸುಪರ್ ಹಿಟ್ ಜಾಲಿಂ. ಹ್ಯಾ ಮಧೆಂ ಮಂಗ್ಳುರಿ ಕ್ರೀಸ್ತಾಂವಾಂಚೆ ದಸ್ತುರೆ ಪರ್ಮಾಣೆ ದೊನೀ ಫಿಲ್ಮಾಂಚ್ಯಾ ಫ್ಯಾನಾಂನಿ ವ ಎಸಿಂನಿ- ಪತ್ರಾಂ, ವಾಟ್ಸಾಪ್, ಫೇಸ್‍ಬುಕಾಂಚೆರ್ ಎಕಾಮೆಕಾಚೆ ಪಾಂಯ್ ವೊಡ್ಲೆ, ಖೆಂಡ್ಲೆಂ, ಬೆಂಡ್ಲೆಂ... ಆತಾಂ ಶಾಂತ್ ಜಾಲಾಂ, ಭೋವ್‍ಶ್ಯಾ ಸಂಪದ್ಲೆಂ.
ಬರೆಂ, ಹಾಂವೆಂ ದೊನ್‍ಯಿ ಫಿಲ್ಮಾಂ ಥಿಯೆಟರಾಕ್ ವಚುನ್ ಪಳೆಲಿಂ. ವೆತಾನಾ ತಕ್ಲೆಂತ್ ಬನ್ಸಾಲಿ ವ ರೋಹಿತ್ ಶೆಟ್ಟಿಕ್, ಬಚ್ಚನ್ ವ ಖಾನಾಂಕ್ ಘೆನಾಸ್ತಾಂ, ಕೊಂಕ್ಣಿಂತ್ ಫಿಲ್ಮಾಂ ಕಾಡ್ಚೆ ತ್ರಾಸ್, ಆಟೆವಿಟೆ, ಬಾಂದ್ಪಾಸ್ ಸಮ್ಜುನ್ ಗೆಲ್ಲೊಂ ದೆಕುನ್ ಮ್ಹಾಕಾ ದೊನೀ ಫಿಲ್ಮಾಂ ಬರಿಂ ಲಾಗ್ಲಿಂ. ಅಪುರ್ಬಾಯ್ ದಿಸ್ಲಿಂ.
.jpg)
ಏಕ್ ಆಸ್ಲ್ಯಾರ್ ಏಕ್ ನಾ
ಏಕ್ ಆಸ್ಲ್ಯಾರ್ ಏಕ್ ನಾ- ಪಯ್ಲೆಂ ಪಳೆಲ್ಲೆಂ ಫಿಲ್ಮ್. ಪ್ರದೀಪ್ ಬರ್ಬೊಜಾ ಮ್ಹಳ್ಳ್ಯಾ ಆಮ್ಚೆ ಮಧ್ಲ್ಯಾ ತರ್ನಾಟ್ಯಾಚೆಂ ತಾಲೆಂತ್, ಮ್ಹಿನತ್, ಘಾಮ್, ಸಪರ್ಪಣ್ ಹ್ಯಾ ಫಿಲ್ಮಾಂತ್ ಉಟೊನ್ ದಿಸ್ತಾ. ಪ್ರೊಡ್ಯುಸರ್ ಫ್ರ್ಯಾಂಕ್ ಫೆರ್ನಾಂಡಿಸಾಕ್ ತೀನ್ ಫಿಲ್ಮಾಂ ಕಾಡ್‍ಲ್ಲೊ ಆನ್ಭೋಗ್ ಸೊಡ್ನ್ ಹೆರ್ ಸಗ್ಳೆಯ್ ಫಿಲ್ಮ್ ಶೆತಾಕ್ ಪಯ್ಲೆ. ತರೀ ಕೊಂಕ್ಣಿಂತ್ ಸಬಾರಾಂಕ್, ತಾಂತ್ಲ್ಯಾ ತಾಂತುಂ ನವ್ಯಾಂಕ್ ಸಾಂಗಾತಾ ಘಾಲ್ನ್ ತಾಂಚೆ ಥಾವ್ನ್ ಮಟ್ಟ್ ದೀಂವ್ಕ್ ಪ್ರದೀಪಾನ್ ಪ್ರಯತ್ನ್ ಕೆಲಾಂ ತೆಂ ಧರ್ ಧರ್‍ಶೆಂ ದಿಸ್ತಾ. ತಾಂತ್ರಿಕತೆಕ್ ವೇಳ್ ಆನಿ ದುಡು ಖರ್ಚುನ್, ತರ್ನ್ಯಾಂಕ್ ತಶೆಂ ಪರ್ನ್ಯಾಂಕ್ ಆಂವಡ್ಚೆಪರಿಂ ಕಾಣಿ ಗುಂತುನ್ ಆಪ್ಲೆಚ್ ಎಕೆ ದಿಶೆನ್ ಗುಂವ್ಡಾವ್ನ್ -ವ್ಹಾವ್ ಕೊಂಕ್ಣಿಂತ್ ಏಕ್ ಬರೆಶೆಂ ಪ್ರಯತ್ನ್ ಕೆಲಾಂ ಮ್ಹಣ್ಚ್ಯಾ ಮಟ್ಟಾಕ್ ವ್ಹರುನ್ ಫಿಲ್ಮ್ ಆಕೇರ್ ಕೆಲ್ಲಿ ಬುದ್ವಂತ್ಕಾಯ್ ಮೆಚ್ವಣೆಚಿ. ಸ್ಕ್ರಿಪ್ಟ್, ಸಂಭಾಶಣಾಂ, ನಟನ್, ಸಂಗೀತ್, ಪದಾಂ, ಗಾಯಾನ್, ಲೊಕೆಶನಾಂ, ಕೆಮರಾವರ್ಕ್, ಎಡಿಟಿಂಗ್ ಅಶೆಂ ಕೊಂಕ್ಣಿಂತ್ ಉಂಚ್ಲೆಂ ಮ್ಹಣ್ಚೆಂ ಪಡ್ದ್ಯಾರ್ ದಾಕೊಂವ್ಕ್ ಪ್ರಯತ್ನ್ ಕೆಲಾಂ.
.jpg)
ನಶಿಬಾಚೊ ಖೆಳ್
ನಶಿಬಾಚೊ ಖೆಳ್- ಫಿಲ್ಮ್ ಆಪ್ಲ್ಯಾಚ್ ಎಕಾ ಖಾಸ್‍ಪಣಾಕ್ ಲಾಗುನ್ ಆಂವಡ್ತಾ. ಕಾಣಿ ಭೋವ್ ಆದ್ಲಿ ತರೀ ಥೊಡಿಂ ಸನ್ನಿವೇಶಾಂ ಆಜೂನ್ ಪ್ರಸ್ತುತ್. ಗರ್ಜೆಚೊ ಖರ್ಚ್, ಹಳ್ಟ್ ತಾಂತ್ರಿಕತಾ ತರೀ ತಿ ವಾಪರ್ಚಿ ಕಲಾ, ಉಣಿಂ ಕಲಾಕಾರಾಂ, ನೀಜ್ ಆನ್ಭೋಗ್ ಜಾಂವ್ಚೆಪರಿಂ ಚಿತ್ರೀಕರಣ್, ನಟನಾಂತ್ ಪ್ರಬುದ್ದತಾ, ಸ್ತ್ರೀ ವರ್ಗಾಚ್ಯಾಂಕ್ ಮೆಚ್ವೊಂಚೆಪರಿಂ ಕಾಣ್ಯೆ ಗುಂತಾಪ್, ಆಕೇರಿಕ್ ಏಕ್ ಟ್ವಿಸ್ಟ್ ಅಶೆಂ ಅಡೇಜ್ ವರಾಂ ಗೆಲ್ಲಿಂಚ್ ಕಳಾನಾಸ್ಲೆಪರಿಂ ಫಿಲ್ಮ್ ಸಜಯಿಲ್ಲಿ ಕೀರ್ತ್ ನಿರ್ದೆಶಕ್ ಹೆರಿ ಫೆರ್ನಾಂಡಿಸಾಕ್ ವೆತಾ. ಕೊಂಕ್ಣಿ ಫಿಲ್ಮ್ ಕಾಡ್ಚೆಂ ಧಯ್ರ್ ಘೆತ್‍ಲ್ಲ್ಯಾಕ್ ಹೆನ್ರಿ ಡಿಸಿಲ್ವಾಕ್ ಚೆಪೆಂ ಉಕ್ಲಿಜೆಚ್.
ಆನಿ ಉಪ್ರಾಂತ್ ಆಪುಣ್ ಬುದ್ವಂತ್ ಮ್ಹಣ್ ದಾಕೊಂವ್ಚೆ ಖಾತಿರ್ ಕೆಂಡುಂಕ್ ತಶೆಂ ಬೆಂಡುಂಕ್ ಗೆಲ್ಯಾರ್ ದೊನೀ ಫಿಲ್ಮಾಂನಿ ಥೊಡೆಶೆಂ ಆಸಾ. ಪೂಣ್ ಕೊಂಕ್ಣಿಚ್ಯಾ ವರ್ತುಲಾಂತ್ ತಶೆಂ ಕರಿನಾಸ್ತಾಂಯ್ ಫುಡೆಂ ತಿದ್ವಣ್ಯೊ ಕರುಂಕ್ ಜಾತಾತ್, ಪಾವಾಜೆ ಜಾಲ್ಲ್ಯಾ ವ್ಯಕ್ತಿಕ್ ಆಪ್ಲೊ ಅಭಿಪ್ರಾಯ್ ಖಾಸ್ಗೆನ್ ದಿಂವ್ಕ್ ಜಾತಾ, ಉಗ್ತ್ಯಾನ್ ಠಿಕಾ ಕೆಲ್ಯಾರ್ ತಿ ವೆಗ್ಳೊ ಅರ್ಥ್ ಘೆತಾ ದೆಕುನ್ ಬರೆಂ ಮಾಗ್ಚೆಂ, ಬರೆಂ ಬರೊಂವ್ಚೆಂ, ಬರೆಂ ಉಲೊಂವ್ಚೆಂ ಚಡ್ ಬರೆಪಣ್ ಹಾಡಿತ್ ಮ್ಹಣ್ಚೊ ಅಂದಾಜ್ ಮ್ಹಜೊ.
- ಲೊಯ್ಡ್ ರೇಗೊ
